Creu

Rydym ni am ddarparu'r rhyddid a'r hyblygrwydd i unigolion a sefydliadau ymgeisio i wneud a fynnent o fewn y disgyblaethau yr ydym yn eu cefnogi.

Bydd angen i bob cais ddangos sut y maent yn datblygu ein blaenoriaethau mewn un neu ragor o'r meysydd canlynol:

• Cydraddoldeb ac amrywiaeth 
• Cyrraedd cymunedau heb eu cynrychioli'n ddigonol, yn ddiwylliannol, yn ddaearyddol, yn gymdeithasol ac yn economaidd 
• Y Gymraeg 
• Cyfiawnder hinsawdd
• Meithrin talent greadigol 
• Datblygu partneriaethau i wireddu uchelgais artistig mewn ffyrdd dychmygus
• Cryfhau gallu a gwytnwch y celfyddydau i fod yn fwy deinamig a chynaliadwy

Gallai hyn gynnwys:

• Ymchwil a datblygu 
• Creu gwaith i'w gyflwyno
• Rhaglennu, cyflwyno a theithio
• Gwyliau 
• Cymryd rhan ac ymgysylltiad cymunedol
• Hyfforddiant neu ddatblygiad proffesiynol 
• Datblygu busnes (ond nid busnesau newydd)

Rhaid cynnal eich prosiect yng Nghymru yn bennaf.

• Gallwn ond ariannu gweithgareddau neu ddigwyddiadau sy'n digwydd y tu allan i Gymru lle gallwch ddangos budd tymor hir i unigolion a chymunedau yng Nghymru.
• Gallwn ystyried ariannu gweithgaredd hyfforddi neu ddatblygu y tu allan i Gymru (lle nad oes darpariaeth debyg ar gael yng Nghymru).
• Gallwn ystyried ariannu rhywfaint o weithgarwch rhyngwladol fel rhan o brosiect ehangach os rhoddir rhesymeg glir.

Rhaid i’ch prosiect ategu eich rhaglen weithgarwch arferol a’i gwella.

Rhaid i’ch prosiect gynnwys gweithio gydag eraill

Mae’r prosiectau gorau’n digwydd pan fydd partneriaid yn cymryd rhan. Byddwn yn disgwyl eich gweld yn gweithio gydag o leiaf un unigolyn neu sefydliad arall a fydd yn eich cynorthwyo chi i ddatblygu a chyflawni’ch prosiect. Gallai fod yn:

• sefydliad partner
• cydweithiwr artistig
• cyfaill beirniadol
• mentor artistig
• cynghorydd busnes
• darparwr hyfforddiant

Rhaid i’ch prosiect fod yn gyfyngedig o ran amser

Mae hyn yn golygu dyddiad cychwyn a dyddiad gorffen pendant. Mae’n syniad da i ganiatáu rhywfaint o amser ychwanegol i chi’ch hun rhag ofn bod angen ichi anfon mwy o wybodaeth atom ar ôl i arian gael ei ddyfarnu. 

Rhaid ichi sicrhau cyllid arall i gyfrannu at gostau cyffredinol eich prosiect 

Ni allwn gefnogi gostau llawn unrhyw brosiect. Rydym fel arfer yn disgwyl i o leiaf 10% o’ch incwm prosiect ddod o ffynonellau ar wahân i Gyngor y Celfyddydau neu’r Loteri Genedlaethol. Am fwy o wybodaeth, darllenwch ein Nodiadau Cymorth Cyllid.

Rhaid i chi ganiatáu digon o amser rhwng cyflwyno cais a chychwyn eich prosiect

Byddwn yn disgwyl gweld digon o amser yn cael ei adeiladu yn eich prosiect i gyflawni'r gwaith yn effeithiol. Mae hyn yn arbennig o bwysig o ran unrhyw waith hyrwyddo, datblygu cynulleidfa neu waith allgymorth.  

Bydd angen i chi ystyried yr amser y bydd angen i chi ddatblygu eich cais yn ogystal â'r amser y mae'n ei gymryd i ni brosesu a gwneud penderfyniad.

• Creu Bach – hyd at £10,000
• Creu Mawr - £10,001 - £50,000

Y ganran uchaf o gostau cymwys eich prosiect y gallwn ei hariannu yw 90% - am fwy o wybodaeth am gwblhau eich cyllid, costau cymwys a ffioedd artistiaid, cliciwch yma. 

Mewn amgylchiadau eithriadol, gall sefydliadau (gan gynnwys gwyliau) ymgeisio am hyd at £100,000 drwy gytundeb ymlaen llaw â'ch Swyddog Datblygu. Cysylltwch â datblygu@celf.cymru os nad ydych yn siŵr a pha Swyddog Datblygu i gysylltu.

Yn achos gwyliau, bydd angen ichi ddangos bod eich prosiect yn meddu ar gyfleoedd ymgysylltu drwy gydol y flwyddyn i artistiaid neu gynulleidfaoedd a phroffil rhyngwladol, yn comisiynu gwaith newydd, yn meithrin talent newydd o Gymru a lleisiau heb eu clywed.

I sefydliadau eraill sy'n dymuno gwneud cais am hyd at £100,000 bydd angen i chi ddangos bod gennych bartneriaethau clir, bod arwyddocâd cenedlaethol i'ch cynnig, yn cynnwys creu neu deithio gwaith a'r potensial i effeithio ar gymunedau mewn ffordd arloesol a dychmygus.

Nid oes dyddiadau cau ar gyfer grantiau Creu Bach, ond mae angen i chi ganiatáu o leiaf wyth wythnos waith rhwng y dyddiad  y byddwch yn cyflwyno eich cais a'r dyddiad yr ydych am ddechrau eich prosiect.

Mae dyddiadau cau penodol ar gyfer grantiau Creu Mawr. Mae angen i chi ganiatáu o leiaf deg wythnos waith rhwng y dyddiad cau a phan fydd eich prosiect yn dechrau.

Dyma'r dyddiadau cau 2024/25 ar gyfer ceisiadau Creu Mawr dros £10,000.

• 8 Mai 2024
• 21 Awst 2024
• 9 Hydref 2024
• 15 Ionawr 2025

Byddwn yn derbyn ceisiadau hyd at 5pm ar y dyddiadau a nodir.

Sylwer, bydd cyfleoedd ariannu wedi'u targedu yn gysylltiedig â rhai o'r dyddiadau cau hyn. Bydd y cyfleoedd ariannu a dargedir yn helpu i gefnogi ffurf gelfyddydol benodol, rhaglen waith neu ein helpu i ddiwallu angen neu fwlch strategol. Bydd rhagor o wybodaeth yn cael ei gyhoeddi maes o law.

Sylwer: Ni allwn ariannu prosiectau sydd eisoes yn digwydd. Felly ni fyddwn ni’n ariannu eich cais os yw dyddiad dechrau eich prosiect cyn inni gael y cyfle i’w asesu. 

Rhaid i’ch cais fod yn gyflawn. Ni fyddwn ni’n derbyn rhagor o wybodaeth ategol ar ôl ichi gyflwyno'ch cais (oni bai mai ni sy’n gofyn amdani). I ddarganfod mwy am beth sy'n digwydd i'ch cais pan fyddwch yn ei gyflwyno, cliciwch yma am y broses ymgeisio.

Byddwn ni’n asesu ceisiadau yn ôl y meini prawf canlynol:

• Safon, cryfder ac arloesedd y cynnig artistig a chyfansoddiad y tîm creadigol – rydym ni’n disgwyl gweld cyfleoedd â chyflog priodol i bobl greadigol, gwneuthurwyr ac artistiaid unigol llawrydd.

Os yw eich cais ar gyfer hyfforddiant/datblygiad proffesiynol neu ddatblygiad busnes/ailfodelu - neu os yw'n rhan o'r cais – dylech esbonio safon a natur y rhai sy'n darparu sgiliau ac arbenigedd. Ystyriwch berthnasedd hyfforddiant i waith eich ymarfer neu'ch sefydliad yn ogystal â sut y bydd y sgiliau o fudd i sector ehangach Cymru.

• Cryfder y cynnig i gyflawni ein blaenoriaethau corfforaethol o ran cydraddoldeb, amrywiaeth, y Gymraeg, cyfiawnder hinsawdd, meithrin talent greadigol a/neu hyrwyddo cynaliadwyedd a gwytnwch y sector.
• Effaith bosibl y prosiect yn awr ac yn y dyfodol, a'i fudd i eraill, o ran y rhai a dangynrychiolir yn ein gwaith a'n buddsoddiad.
• Safon y cysylltiadau neu'r partneriaethau sydd ar waith neu sy'n cael eu datblygu i gefnogi'r prosiect.
• Cryfder y cynlluniau rheoli prosiect ac ariannol i gyflawni'r prosiect a defnyddio’r arian cyhoeddus yn briodol.

Yn y meini prawf, byddwn ni hefyd yn ystyried lledaeniad daearyddol gweithgarwch fel rhan o'n penderfyniadau.

Gallwch ddod o hyd i dempled o'r cais o yn yr adran Dogfennau Allweddol isod.

Rydym yn caniatáu ichi gyflwyno atodiadau ychwanegol i gefnogi eich cais, cliciwch yma am ragor o wybodaeth.

Mae Cyngor Celfyddydau Cymru’n darparu gwybodaeth mewn print bras, Braille, sain, Hawdd ei Ddeall ac Iaith Arwyddion Prydain. Byddwn hefyd yn ceisio darparu gwybodaeth mewn ieithoedd heblaw Cymraeg neu Saesneg os gofynnir amdani.

Os oes angen cymorth arnoch chi, gallwch ddysgu mwy am beth allwn ni ei wneud a sut i'w drefnu yma.

Os oes gennych gwestiwn ar ôl i chi ddarllen y wybodaeth yma, darllenwch y Cwestiynau Cyffredin yn gyntaf - mae’n bosibl bod yr ateb yno. Os oes arnoch angen mwy o wybodaeth, anfonwch eich ymholiad at grantiau@celf.cymru neu ffoniwch 03301 242733.