Rydym yn gwybod bod rhai pobl yn wynebu rhwystrau wrth ymgeisio.
Mae cymorth hygyrchedd ar gael i bobl:
- B/byddar
anabl
niwroamrywiol
ag anawsterau dysgu
â phroblemau iechyd meddwl neu ag iechyd gwael
Rydym yn gwybod efallai na fydd angen unrhyw gymorth hygyrchedd ar rai pobl sydd mewn un o’r categorïau uchod ond os ydych yn wynebu rhwystrau o ran cael ein harian, rydym am helpu.
Byddwn yn gofyn beth yw'r rhwystrau pan fyddwn yn trefnu cymorth ichi i sicrhau ein bod yn eich cefnogi'n iawn ac yn rhoi'r pethau cywir ar waith. Os oes gennych Ddogfen Hygyrchedd, anfonwch honna gyda'ch cais. Mae yna dempled Dogfen Hygyrchedd ar waelod y dudalen we hon os hoffech chi gwblhau un.
Os byddai'n well gennych gael sgwrs am gymorth hygyrchedd yn hytrach na darllen y wybodaeth ar-lein, ffoniwch ni ar 03301 242733 neu e-bostiwch cymorth.hygyrch@celf.cymru i drefnu sgwrs anffurfiol.
Mae modd inni eich helpu drwy gydol y broses o ymgeisio.
- Cyn ichi ymgeisio
Mae modd inni eich helpu gyda'n gwybodaeth a'n gwasanaethau cyn ichi ymgeisio drwy:
gwirio a ydych yn gymwys ac esbonio’r broses ymgeisio
llywio ein systemau, fel y porth ariannu
sefydlu proffil yn ein porth ariannu
cysylltu â Swyddog Datblygu os hoffech ragor o gyngor am ddatblygu eich cais
Byddwn yn gallu dangos ichi sut i ddefnyddio'r porth ariannu dros alwad Sŵm neu Dimoedd os ydych yn ei chael hi'n anodd.
Os oes angen, byddwn yn gallu eich cefnogi drwy'r cam yma gyda chymorth hygyrchedd i helpu gyda’r canlynol, er enghraifft:
darllen a deall ein canllawiau
cymryd nodiadau mewn cyfarfodydd unigol â ni
cyfieithydd Arwyddeg mewn cyfarfodydd unigol â ni
Byddwn yn ystyried cost a beth sy'n bosibl wrth ddod o hyd i'r ffordd orau o’ch helpu. Byddwn hefyd yn ystyried yr hyn sy'n well gennych.
Unwaith y byddwn yn gwybod eich bod chi a'ch prosiect yn gymwys, byddwn yn gallu eich cefnogi i lunio eich cais.
Os ydym yn talu am gymorth hygyrchedd cyn ichi ddechrau llunio eich cais, nid oes rhaid ichi gyflwyno'r prosiect os ydych yn teimlo nad yw'n barod eto, neu os nad yw ein harian yn addas ichi.
- Ymgeisio
Os chi yw'r prif ymgeisydd ac angen cymorth hygyrchedd unigol i ymgeisio, byddwn yn gallu talu am weithiwr cymorth hygyrchedd i'ch cynorthwyo sy’n gallu bod yn:
gweithiwr cymorth arbenigol, er enghraifft cyfieithydd Arwyddeg neu gyfieithydd ar gyfer iaith ar wahân i'r Gymraeg a'r Saesneg
rhywun i'ch cefnogi gydag anghenion ychwanegol wrth ymgeisio
rhywun i'ch cefnogi i gael eich cais i'r porth ariannu
Nid ydym yn gallu talu am y canlynol:
cymorth i ddatblygu eich cais, fel cost gweithiwr celfyddydol, awdur ceisiadau neu ymgynghorydd i ddatblygu eich syniad prosiect
costau y mae’r cynllun Hygyrchedd at Waith neu unrhyw ffynonellau eraill eisoes yn eu talu. Mae rhagor o wybodaeth am y cynllun Hygyrchedd at Waith ar gael yma: www.gov.uk/access-to-work
Bydd ein Swyddog Grantiau a Hygyrchedd a'n Swyddogion Datblygu’n gallu eich helpu i drefnu eich gweithiwr cymorth hygyrchedd os nad oes gennych rywun eisoes.
Cysylltwch â'r tîm Grantiau a Gwybodaeth ar 03301 242733 neu e-bostiwch cymorth.hygyrch@celf.cymru
- Dyddiadau cau am gymorth hygyrchedd
Pythefnos cyn dyddiad cau'r gronfa yw’r dyddiad cau inni drefnu cymorth hygyrchedd. Mae’n sicrhau ein bod yn cael y gefnogaeth gywir ichi ac yn rhoi digon o amser ichi weithio gyda nhw.
Ar gyfer Creu (grantiau bach a mawr), byddwn yn gallu talu am hyd at 3 diwrnod o gymorth.
Ar gyfer Cyfleoedd Rhyngwladol, byddwn yn gallu talu am hyd at 2 ddiwrnod o gymorth.
Ar gyfer Camau Creadigol, byddwn yn gallu talu am hyd at 2 ddiwrnod o gymorth.
Ar gyfer ailgyflwyno ceisiadau, byddwn yn gallu talu am hyd at 2 ddiwrnod o gymorth.
Ar gyfer Adroddiadau Diweddu, byddwn yn gallu talu am hyd at 1.5 diwrnod o gymorth.
- Trefnu Gweithiwr Cymorth Hygyrchedd
Eich dewis chi yw pwy fydd eich gweithiwr cymorth hygyrchedd. Efallai y bydd gennych rywun i gymryd nodiadau, cyfieithydd neu’ch gweithiwr cymorth rheolaidd. Os nad oes gennych un eisoes, rhowch wybod inni a byddwn yn gallu eich rhoi mewn cysylltiad â gweithiwr priodol. Nid ydym yn gallu gwarantu cefnogaeth bob tro oherwydd y galw ond byddwn yn ceisio ein gorau glas i roi cefnogaeth.
Mae pob cais yn cael ei ystyried ar sail eich gofynion a lefel y gefnogaeth sydd ei angen arnoch. Byddwn yn gallu talu cyfradd resymol o hyd at uchafswm o £300 y dydd (3 diwrnod ar y mwyaf) am gymorth arbenigol. Os yw'r gyfradd ddyddiol y mae gweithiwr cymorth yn gofyn amdano’n uwch na hyn, efallai y byddwn yn gofyn am:
dyfynbrisiau eraill neu
dadansoddiad manwl o'r costau
Ar ôl i’r gweithiwr cymorth gyflawni ei waith, rhaid iddo anfon ei anfoneb at cymorth.hygyrch@celf.cymru Byddwn yn ei dalu pan fyddwn yn gwybod eich bod yn fodlon â'i waith.
Nid ydym yn gallu talu eich ffrindiau, eich teulu neu bobl sy’n byw gyda chi i roi cymorth hygyrchedd. Nid ydym ychwaith yn gallu talu am gymorth hygyrchedd gan bobl sy'n cyflawni eich prosiect. Dylai gweithwyr cymorth hygyrchedd gael profiad o roi cymorth ar bethau fel ysgrifennu ceisiadau.
- Proses cymorth hygyrchedd i ymgeisio
- Siaradwch â'ch Swyddog Datblygu am eich angen am gymorth hygyrchedd, neu e-bostiwch cymorth.hygyrch@celf.cymru
- Ar ôl cael gwybod bod eich prosiect yn gymwys, byddwn yn gofyn ychydig o gwestiynau ac yn llenwi ffurflen gyda chi i gael cymorth hygyrchedd priodol.
- Os oes gennych weithiwr cymorth hygyrchedd eisoes, byddwn yn cytuno ar faint o ddiwrnodau o gymorth sydd eu hangen. Os nad oes gennych weithiwr cymorth hygyrchedd mewn golwg, byddwn yn gallu cysylltu â'n rhwydwaith o weithwyr i weld pwy sydd ar gael. Byddwn yn rhoi gwybod ichi pwy sy’n gallu helpu a byddwch yn gallu dewis un os oes rhagor nag un ar gael.
- Byddwn yn trefnu cyfarfod â chi, eich gweithiwr cymorth hygyrchedd a'r Swyddog Grantiau a Hygyrchedd. Bydd y cyfarfod yn cyflwyno pawb yn anffurfiol a bydd yn rhoi amser inni gynllunio sut y byddwch yn treulio eich amser gyda'ch gilydd.
- Byddwch chi a'ch gweithiwr cymorth hygyrchedd yn trefnu pryd y bydd y gweithiwr yn eich cefnogi, yn ôl nifer y diwrnodau o gymorth sydd yn y cytundeb ac yn ôl y cynllun yng ngham 4.
- Ar ôl i'ch cymorth hygyrchedd orffen, rhowch wybod inni. Hoffem wneud yn siŵr bod gennych yr holl gefnogaeth sydd ei angen arnoch ac rydym bob amser yn agored i syniadau a fyddai'n gwella ein gwasanaeth.
- Bydd eich gweithiwr cymorth hygyrchedd yn anfon anfoneb atom y byddwn yn ei thalu.
- Yn ystod eich prosiect (rydym yn eu galw'n gostau hygyrchedd personol)
Os yw'ch cais yn llwyddo, byddwn yn gallu talu costau cymorth hygyrchedd i reoli a chyflawni'r prosiect. Byddai’r costau ar eich cyfer chi neu’r tîm sy'n cyflawni'r prosiect.
Costau Hygyrchedd Personol yw ein henw ni ar y costau hygyrchedd i gyflenwi a rheoli eich prosiect. Byddwn yn gallu talu costau cymorth hygyrchedd i chi neu unrhyw un sy'n cyflawni a rheoli eich prosiect.
Mae enghreifftiau o gostau hygyrchedd personol yn cynnwys:
- costau cyfieithydd
- gweithwyr cymorth neu gymerwyr nodiadau
- offer neu feddalwedd arbenigol sy'n helpu i oresgyn rhwystrau hygyrchedd
- llety arbenigol
- teithio arbenigol
- llety/teithio i gyfieithwyr neu weithwyr cymorth
Nid ydym yn gallu talu am:
- triniaeth barhaus fel therapi neu aciwbigo
- costau gofalu
Dim ond ar gyfer pobl sy'n rheoli a chyflawni eich prosiect y mae Costau Hygyrchedd Personol.
Yn eich cyllideb, yn y tab Costau Hygyrchedd Personol ar wahân, rhowch ddadansoddiad o'r costau, er enghraifft: gweithiwr cymorth: £X y dydd, X diwrnod.
Os oes angen cymorth hygyrchedd arnoch i ysgrifennu eich adroddiad diweddu i’r prosiect, cynhwyswch y costau yn yr adran yna. Byddwn yn gallu talu am hyd at 1.5 diwrnod o gymorth gydag ysgrifennu eich adroddiad diweddu.
Dylai costau ar gyfer gwneud eich prosiect yn fwy hygyrch i gynulleidfaoedd neu gyfranogwyr, neu ar gyfer cyfrifoldebau gofalu neu ofal plant fod ym mhrif adran y gyllideb, nid yn yr adran Costau Hygyrchedd Personol.
Mae Costau Hygyrchedd Personol ar wahân i'r swm rydych yn gofyn am y prosiect. Er enghraifft, os ydych yn gofyn am yr uchafswm sydd ar gael, gallwch gynnwys Costau Hygyrchedd Personol o hyd, hyd yn oed os yw'r cyfanswm wedyn yn fwy nag uchafswm posibl y grant. Nid oes modd cynyddu costau ar ôl inni roi grant, felly gwnewch yn siŵr eich bod yn cynllunio'r costau’n ofalus.
Os nad ydych yn siŵr a yw eich Costau Hygyrchedd Personol yn gymwys, cysylltwch am gyngor â: cymorth.hygyrch@celf.cymru
- Gwneud eich gwaith yn hygyrch i eraill
Byddwn yn gallu helpu gyda chostau gwneud eich gwaith yn hygyrch i gynulleidfaoedd a chyfranogwyr fel rhan o gyllideb eich prosiect hefyd. Rhaid i’r costau fynd yn eich prif gyllideb prosiect.
Dyma ganllawiau defnyddiol:
- Ymgeisio drwy fformatau amgen
Os hoffech ymgeisio drwy fideo/sain, mae canllawiau yma.