Cyngor Celfyddydau Cymru yn lansio cronfa Cynyrchiadau Mawr i greu cyfle ychwanegol am gelfyddydau byw ar raddfa fawr yng Nghymru

Mae Cyngor Celfyddydau Cymru wedi cyhoeddi y bydd yn lansio Cynhyrchiadau Mawr — cronfa newydd i gefnogi profiadau celfyddydol byw uchelgeisiol, o ansawdd uchel sy’n dathlu creadigrwydd Cymru ar raddfa fawr – ym mis Tachwedd.   

Mae’r canllawiau nawr ar gael ar wefan Cyngor y Celfyddydau ac mae sefydliadau’n cael eu hannog i wneud yn siwr bod eu projectau’n gymwys cyn i’r gronfa agor am geisiadau ar ddydd Llun, 3 Tachwedd 2025. 

Gan gynnig grantiau rhwng £100,000 a £300,000, bydd y gronfa yn edrych i gefnogi sefydliadau sy’n creu cynyrchiadau eithriadol ym meysydd theatr, dawns a theatr gerdd sy’n gallu ymgysylltu ag ystod eang o gynulleidfaoedd yng Nghymru a thu hwnt. Dylai’r prosiectau arddangos y gorau o dalent Cymru a rhai sy’n gweithio yng Nghymru, ac amlygu partneriaethau artistig cryf, gan ddod ag adnoddau ychwanegol i mewn i ymestyn uchelgais ac ansawdd ble bo angen, yn ogystal â chynllunio cadarn a chynaliadwyedd ariannol. 

Mae’r gronfa newydd yn dilyn cyhoeddiad Cyngor y Celfyddydau fis Gorffennaf yma ei fod am ailstrwythuro ei raglen Loteri blaenllaw, Creu, mewn ymateb i adborth gan y sector oedd yn galw am ddull mwy penodol ac ymatebol o fuddsoddi mewn celfyddydau. Bydd yr ailstrwythuro’n cyflwyno chwe ffrwd ariannu erbyn 2026, gan gynnig ffrydiau clir sy’n ymestyn yn ehangach ar draws cymunedau a ffurfiau celfyddydol. 

Bydd Cynyrchiadau Mawr ar agor i sefydliadau sydd wedi’u lleoli yng Nghymru yn unig, ac mae wedi eu anelu at gynhyrchwyr profiadol sydd â hanes cryf o gyflwyno gwaith rhagorol. Dim ond un rownd ariannu fydd bob blwyddyn.