Rhowch Gynnig Arni: agored ar gyfer ceisiadau

Gall profi’r celfyddydau fod yn ysbrydoledig, yn heriol, yn ddeniadol ac yn hwyl, ac mae ganddo ran bwysig i’w chwarae ym mhrofiadau dysgu ein pobl ifanc ble bynnag yng Nghymru y maent yn byw.

Credwn y dylai ein holl blant a phobl ifanc gael y cyfle i gael eu hysbrydoli a’u cyffroi gan y gorau sydd gan y celfyddydau mynegiannol yng Nghymru i’w gynnig. Boed hynny er mwyn ‘rhoi cynnig arni’ ar rywbeth newydd, datblygu eu sgiliau creadigol ac artistig neu feithrin eu lles a’u hunan-barch. Gall natur ddeinamig y celfyddydau mynegiannol ennyn diddordeb, ysgogi ac annog dysgwyr i ddatblygu eu sgiliau i'r eithaf.

Cynlluniwyd Rhowch Gynnig Arni i roi cyfleoedd i ddysgwyr 3 – 16 oed roi cynnig ar weithgaredd neu weithdy untro i gefnogi ysgolion i gyflwyno Maes Dysgu a Phrofiad y Celfyddydau Mynegiannol. Mae'r gronfa'n ymdrin â phum disgyblaeth: celf; dawns; drama; cerddoriaeth; ffilm a’r cyfryngau digidol.

Gall sefydliad celfyddydol neu ymarferydd creadigol ddarparu'r gweithgarwch a gall ddigwydd un ai yn yr ysgol neu mewn lleoliad addas yng Nghymru. Gall y gweithgarwch fod yn ystod oriau ysgol neu fel gweithgaredd allgyrsiol. Gall y gweithgarwch fod yn un sesiwn neu gael ei gynnal ar draws sawl diwrnod.

Mae’r gronfa’n cynnig grantiau o hyd at £1,500 a gall ysgolion a gynhelir gan y wladwriaeth, unedau cyfeirio disgyblion a/neu sefydliadau celfyddydol a diwylliannol yng Nghymru wneud ceisiadau.

Mae canllawiau llawn ar gael yma.

Mae Rhowch Gynnig Arni yn cefnogi'r rhaglen ar gyfer Llywodraeth 2021-26 a'r Cynllun Cenedlaethol ar gyfer Addysg Gerdd.