Mae’r asiantaeth datblygu ffilmiau yng Nghymru wedi buddsoddi £253,260 pellach o arian y Loteri Genedlaethol i ddatblygu ffilmiau nodwedd newydd gan awduron, cyfarwyddwyr a chynhyrchwyr o Gymru.
Mae'r gyfres o ffilmiau eleni yn cyflwyno amrywiaeth gyffrous o leisiau o gymuned greadigol Cymru wrth iddyn nhw adrodd straeon grymus mewn sawl iaith ar draws animeiddiadau, ffilmiau dogfen a ffuglen actio byw.
Wrth gyflwyno'r prosiectau newydd i restr ddatblygu Ffilm Cymru Wales, meddai Jessica Cobham-Dineen, Rheolwr Datblygu a Chynhyrchu: “Mae’r gyfres ddiweddaraf hon o wobrau yn tynnu sylw at yr arloesedd a’r dalent sydd yng Nghymru. Mae pob stori yn cynnig rhywbeth newydd, boed yn safbwynt, yn llais, neu'n arddull. Rydyn ni’n arbennig o falch o weld y gwneuthurwyr ffilmiau Nia Alavezos, Emily Burnett, Ioan Morris a Ray Wilson yn datblygu eu ffilmiau nodwedd cyntaf ar ôl symud ymlaen o Beacons, ein cynllun ffilmiau byrion.”
Mae Cyllid Datblygu 2025 Ffilm Cymru Wales wedi’i ddyfarnu i:
A Picture Tells a Thousand Lies
Ffilm Ddogfen. Brad diwylliannol y ddelwedd fel ffynhonnell wirionedd, a ffugiadau eraill.
Cyfarwyddwr: Rob Alexander
Cynhyrchwyr: Rob Alexander, Ian Davies, Ari Matikainen
Arcana
Ffilm Eco-Gyffro. Pan mae merch amheugar yn ei harddegau yn mynd i ŵyl ysbrydol, mae hi'n cwrdd â chymeriadau 'tarot', sy'n pylu llinellau realiti, gan herio ei difaterwch tuag at ddyfodol y dref.
Awdur-Gyfarwyddwr: Katie Bonham
Cynhyrchydd: Ray Wilson
Cynhyrchydd Gweithredol: Samantha O’Rourke
Are You Nervous?
Drama. Mae Sasha, merch uchel ei chloch bedair ar ddeg oed, a'i nain, dynes ddi-lol hanner cant ac wyth oed, ill dwy yn cychwyn ar daith ddryslyd a bregus o hawlio eu rhywioldeb.
Awdur: Bethan Marlow
Cyfarwyddwr: Amy Hodge
Cynhyrchydd: Oriane Pick
Bad Form
Drama. Gyda'i merch ifanc yn cael ei bwlio'n ddi-baid am ei hymddangosiad, mae ei mam - llawfeddyg plastig uchel ei pharch - yn ei chael ei hun mewn penbleth foesol gymhleth. Prawf o gysyniad yw hwn i gefnogi datblygiad prosiect nodwedd Alys Metcalf, Little Rock.
Awdur-Gyfarwyddwr: Alys Metcalf
Cynhyrchydd: Andrew Bendel
Cast: Jamie Bamber a Kerry Norton
Beach Body
Drama Gomedi. Mae morforwyn, sydd wedi'i dal yn ei chorff dynol mewn parti llawn galar a gwadu meddw, yn ceisio dod o hyd i iachâd i’r cyflwr dynol.
Awdur: Toby Parker Rees
Cynhyrchwyr: Ray Wilson, Katie Bonham
Cynhyrchydd Gweithredol: Samantha O’Rourke
Brando's Bride
Drama. Yn Hollywood y 1950au, mae seren ifanc o India yn priodi seren ffilm enwocaf y byd, ond mae ei bywyd hudolus yn chwalu pan gaiff ei ddatgelu mai twyll ydyw.
Awdur: Gurpreet Kaur Bhatti
Cyfarwyddwr: Aisling Walsh
Cynhyrchwyr: Bethan Jones, Sarah Broughton
Cranogwen
Bywgraffiad rhamantus. Ym Mhrydain oes Fictoria, mae Cranogwen yn eithriad i'w thraddodiad. Ar ôl dilyn ei thad i'r môr, mae ei bywyd yn newid am byth.
Awdur: Casi Wyn
Cynhyrchydd: Catrin Cooper
Diwedd Y Byd
Comedi arswyd yn y Gymraeg. Mae mam afradlon a'i mab yn ceisio cymodi, ond mae sombïod yn dod rhyngddyn nhw.
Awdur: Rolant Tomos
Ghosts Of Yesterday
Animeiddiad realistig hudolus. A fyddech chi'n peryglu'r cyfan pe gallech chi deithio yn ôl mewn amser a siarad â rhywun o'ch gorffennol?
Awdur-Gyfarwyddwr: Nia Alavezos
Cynhyrchydd: Allissoon Lockhart
Grown Girl
Drama dod i oed. A hwy eu dwy yn hoff o hen ffilmiau Hollywood, mae dwy 'ferch Ddu' o Gymru yn dod o hyd i’w ffordd drwy’r arddegau, rhyw, cariad a'u cyfeillgarwch unigryw mewn maestref dosbarth canol Gwyn.
Awdur-Gyfarwyddwr: Emily Burnett
Cynhyrchydd: Nan Davies
Hollywood Ending
Comedi. Mae ffilm fer myfyriwr ysgol ffilm, sy’n seiliedig ar stori wir, yn gwneud glanhawr ysgol yn enwog ar ddamwain, ond er bod y byd a'r myfyriwr yn hiraethu am stori Hollywoodaidd o godi o dlodi i gyfoeth, mae hi'n fodlon iawn ei byd fel ag y mae.
Awdur-Gyfarwyddwr: Sara Sugarman
I’r Gwyllt
Ffantasi yn y Gymraeg. Pan gaiff Cadi’r dasg o ysgrifennu stori, mae coedwig ddirgel yn ymddangos ar gyrion y dref sy'n aflonyddu'r gymuned.
Awdur: Brynach Higginson
Cynhyrchydd Gweithredol: Catrin Cooper
Iya
Drama amlieithog. Mae merch yn ei harddegau yn dod yn ffrindiau â milwr sydd wedi’i anafu ar dir gwyllt mewn ardal sydd wedi'i chwalu gan ryfel yn Cameroon ac yn dod o hyd i loches rhag y rhyfel hyd nes i ddieithryn peryglus ennyn amheuaeth, cenfigen, rhagfarn a thrais.
Awduron: Eric Ngalle Charles, Greg Lewis
Kuji
Drama. Stori wir ryfeddol Matthew Bevan - “KUJI” - bachgen yn ei arddegau o Gymru a haciodd y Pentagon wrth chwilio am dystiolaeth o fodau arallfydol, gan achosi iddo ffoi rhag yr FBI.
Awdur: Roger Williams
Cynhyrchydd: Kate Cook
Cynhyrchwyr Gweithredol: Nicola Pearcey, Bruce Goodison
Marmalade Is Missing
Ffantasi animeiddiedig. Mae perchennog clwb nos yn ceisio tanseilio ei gystadleuwyr trwy herwgipio eu seren.
Rhaid i Margo Monroe a'i ffrindiau carismatig ddilyn cliwiau i achub y dydd.
Awdur: Sam Beckbessinger
Cyfarwyddwr: James Nutting
Cynhyrchwyr: Amy Morris, Glen Biseker
Private Dai
Comedi noir. Pan mae David (Dai) Pennoyer, y cyn-garcharor a drodd yn dditectif preifat, yn dychwelyd i'w dref enedigol, daw wyneb yn wyneb â’i orffennol - mewn mwy nag un ffordd.
Awdur: Ioan Morris
Cynhyrchydd: Owen Lloyd Richards
White Out
Eco-antur. Hynt i ddatgelu olion anghofiedig Matthew Henson, yr archwiliwr du a wnaeth ddarganfod pegwn y gogledd ym 1909 ac, yn dawel, a newidiodd ein byd am byth.
Awdur: Richard Parks
Cynhyrchydd: Jasper Warry
Mae cymorth Ffilm Cymru Wales yn tywys awduron, cyfarwyddwyr a chynhyrchwyr drwy’r broses ddatblygu, o’r driniaeth i’r drafft terfynol ac ariannu, gyda chyngor wedi’i deilwra a hyd at £50,000 o gyllid. Mae’r gronfa yn cyfuno arian y Loteri Genedlaethol a ddirprwywyd trwy Gyngor Celfyddydau Cymru a Sefydliad Ffilm Prydain trwy RWYDWAITH BFI.
Bydd cronfa datblygu ffilmiau nodwedd Ffilm Cymru Wales yn ailagor i dderbyn ceisiadau ym mis Ebrill 2026.