Mae Cyngor Celfyddydau Cymru yn cael ei ailstrwythuro er mwyn cynyddu’r gefnogaeth i faes y celfyddydau.

Daw'r ailstrwythuro mewn ymateb i adborth gan staff a'r gymuned gelfyddydol, yn ogystal â sawl adroddiad a gomisiynwyd yn ddiweddar i ffurfiau celf penodol fel dawns, cerddoriaeth werin a’r theatr Saesneg yng Nghymru, sydd wedi tanlinellu’r angen i Gyngor Celfyddydau Cymru esblygu wrth i ofynion y celfyddydau newid dros amser.

Mae'r newidiadau yn bennaf o fewn cyfarwyddiaeth y celfyddydau, ac yn creu strwythur o Benaethiaid penodol, Rheolwyr Perthynas a Hwyluswyr Datblygu Celfyddydau penodol. Bydd capasiti pellach hefyd yn cael ei greu o fewn y tîm datblygu busnes, mewn ymateb i alwadau gan y sector i gynnig mwy o gefnogaeth yn y maes hwn. Mae'r ailstrwythuro felly yn golygu cynnydd net o 8 aelod o staff o fewn y sefydliad, er bod 18 o’r swyddi presennol wedi'u rhoi 'mewn perygl'. 

"Ein bwriad yw buddsoddi yn nyfodol y celfyddydau ac adeiladu ecoleg celfyddydau Cymru," meddai Catryn Ramasut, Cyfarwyddwr Celfyddydau newydd Cyngor Celfyddydau Cymru. "Bydd y strwythur hwn yn caniatáu i staff Cyngor y Celfyddydau ganolbwyntio ar eu cryfderau a darparu cefnogaeth ddyfnach, fwy arbenigol i'r sector, boed hynny’n ddatblygu sefydliadol neu’n gais am gyllid hyd at gyflawni prosiectau neu raglenni.

"Fel rhan o'r broses, rydym hefyd yn adolygu ein strwythur grantiau i sicrhau ei fod yn cefnogi'r sector yn effeithiol. Rydyn ni'n cyflwyno mwy o gronfeydd wedi'u targedu at feysydd penodol o’r celfyddydau, felly edrychwch allan am gyhoeddiadau pellach ynglŷn â hynny’n fuan."

Y prif resymau dros yr ailstrwythuro yw:

  • Gwella arbenigedd o fewn ffurfiau celfyddydol penodol er mwyn gwasanaethu sefydliadau celfyddydol yn well
  • Creu swyddi a strwythurau cliriach i wella'r profiad i’n partneriaid yn y celfyddydau
  • Creu rhagor o gapasiti er mwyn rhoi rhagor o sylw unigol a chefnogaeth busnes.

Mae’r cynigion wedi eu rhannu gydag Undeb Unite yng Nghymru, ac mae staff yr effeithir arnynt yn cael eu cefnogi drwy'r broses. 

Ychwanegodd y Prif Weithredwr Dafydd Rhys, "Rydym yn hyderus y gallwn gyflawni'r ailstrwythuro hwn heb effeithio ar gyfran y cyllid sy'n mynd i'r sector, sydd dros 90%. Rydym wedi ymrwymo i gefnogi staff trwy gydol y cyfnod hwn o newid sefydliadol ac eisiau diolch yn gyhoeddus i bawb am eu proffesiynoldeb trwy'r broses hon.

"Mae hwn yn fuddsoddiad yn nyfodol diwylliannol Cymru a fydd yn dod a budd i'r celfyddydau a'r bobl rydyn ni'n eu gwasanaethu. O ran maes y celfyddydau, bydd hyn yn darparu arbenigedd arbenigol, pwyntiau cyswllt cliriach a chefnogaeth benodol sy'n cryfhau rhagoriaeth artistig a gwytnwch gweithredol. I bobl Cymru, bydd yn galluogi ecosystem gelfyddydol fwy bywiog gyda gwell mynediad at brofiadau o ansawdd uchel ar draws pob cymuned a gwell stiwardiaeth o adnoddau cyhoeddus."

Disgwylir i'r strwythur newydd fod ar waith erbyn dechrau'r hydref, gyda swyddi newydd yn cael eu hysbysebu dros yr haf.