Mae Cyngor Celfyddydau Cymru wedi cyhoeddi’r prosiectau diweddaraf a fydd yn elwa ar gyllid y Loteri Genedlaethol drwy ei raglen flaenllaw, Creu.

Mae Creu yn cefnogi datblygiad profiadau celfyddydol o safon uchel sy’n helpu unigolion a sefydliadau ar draws Cymru i ymgysylltu â’r cyhoedd.

Dywedodd Dafydd Rhys, Prif Weithredwr Cyngor Celfyddydau Cymru:

“Rydym yn falch o gefnogi’r prosiectau beiddgar a gwreiddiol hyn sy’n adlewyrchu cryfder creadigrwydd yng Nghymru fel rhan o’r rownd ddiweddaraf o gyllid Creu. Diolch i chwaraewyr y Loteri Genedlaethol, gallwn barhau i fuddsoddi mewn gwaith sy’n siarad â chymunedau, yn meithrin talent ac yn arddangos amrywiaeth gyfoethog ein tirwedd gelfyddydol.”

Mae’r rownd ddiweddaraf hon yn dathlu creadigrwydd ar draws Cymru, gyda chyllid yn cael ei ddyfarnu i 56 o sefydliadau o bob maint – o leoliadau celfyddydol sefydledig i brosiectau cymunedol ar lawr gwlad.

Dywedodd Catryn Ramasut, Cyfarwyddwr Celfyddydau Cyngor Celfyddydau Cymru:

“Gyda’i gilydd, mae’r prosiectau hyn yn adlewyrchu lled a safon y gwaith y mae’r gronfa Creu yn ei alluogi: cefnogi pobl ifanc, dathlu’r Gymraeg a’n traddodiadau, cefnogi creadigrwydd dan arweiniad pobl anabl, a sicrhau bod cymunedau ledled Cymru yn gallu cael mynediad at brofiadau celfyddydol ysbrydoledig ar draws pob genre.”

Dyma rai enghreifftiau o’r sefydliadau a’r prosiectau fydd yn elwa:

Grand Ambition, casgliad creadigol sydd wedi’i leoli yn Theatr Grand Abertawe, sy’n cefnogi ysgrifennu newydd a datblygu ar themâu cymdeithasol brys.

Ym Mhowys, mae Menter Iaith Maldwyn yn hyrwyddo dawns draddodiadol Gymraeg drwy hyfforddi rhwydwaith newydd o hyfforddwyr a mentora dawnswyr ifanc.

Yn Wrecsam, mae NEW Sinfonia yn meithrin talent leol drwy berfformio cerddorfaol a chyfranogiad cymunedol.

Yn Fangor, bydd Frân Wen yn ail-lunio clasur Cymraeg Islwyn Ffowc Elis Wythnos yng Nghymru Fydd ar gyfer cynulleidfa gyfoes.

Mae’r prosiectau hefyd yn tynnu sylw at gyfoeth creadigrwydd cymunedol:

Yn y Rhondda, mae Avant Cymru yn rhoi llais i bobl ifanc drwy hip hop a dawns stryd.

Bydd Community Music Wales yn dod â chyfleoedd gwneud cerddoriaeth lawr gwlad i gymunedau ar draws y wlad.

Yn y cyfamser, mae Makers Guild in Wales ym Mae Caerdydd yn cysylltu crefftwyr medrus â’r cyhoedd drwy arddangosfeydd a dysgu – o wneud basgedi i wydr lliw.

Mae cefnogaeth gref hefyd i’r celfyddydau cynhwysol a’r rhai dan arweiniad pobl anabl. Mae Hijinx yn parhau i greu cyfleoedd perfformio arloesol gydag artistiaid ag anableddau dysgu a/neu awtistiaeth.

Mae OPRA Cymru yn bwriadu nodi 90 mlynedd ers Penyberth gyda opera newydd a fydd yn dod ag artistiaid proffesiynol a chorau cymunedol ynghyd.