Heddiw bydd cerdd gomisiwn gyntaf Hanan Issa yn ei swydd newydd fel Bardd Cenedlaethol Cymru yn agor digwyddiad ar-lein tri diwrnod o hyd sy’n cael ei gynnal gan Cyngor Celfyddydau Cymru am 12 canol dydd.
Cynhelir Dychmygu’n dyfodol: sgyrsiau am y celfyddydau yng Nghymru ar-lein rhwng 20 a 22 Medi a darlleniad o’r cherdd gan Hanan ei hun fydd yn agor y digwyddiad am 12 canol dydd heddiw.
Mae’r gerdd, The ABCD’s of Equal Opportunities yn fyfyrdod grymus ar hunaniaeth a pherthyn. Bydd Iestyn Tyne hefyd yn cyflwyno ei ddehongliad ef yn Gymraeg o gerdd Hanan yn yr un digwyddiad. Dyma ddehongliad Iestyn o gerdd Hana Issa:
ABCCh Hawliau Cyfartal
A glywaist ti erioed am ymglymiad cwantwm?
Baich credu nad wyt ti’n perthyn am fod dy wddw’n
Cau am Arabeg pan fydd ffrind gwyn yn colli rhywun annwyl.
Chwarae gêm y ffurflen fonitro, honno sy’n bodoli er mwyn i ni
Amcangyfrif ac ystyried pa nifer yn union o
Bobl a ymdrochodd mewn llwch siocled yn 2020 pan wnaethpwyd
Camgymeriad yn y ffatri Lindt honno, gan orchuddio ceir a simneiau’r dre â
Choco. “Mae breuddwydion yn dod yn wir!” meddai rhywun, unwaith.
A glywaist ti erioed am ymglymiad cwantwm? O’u tynhau’n
Blethi, mae’r elfennau hollt hynny sy’n
Cadwyno trwy bob perthynas hirbell yn herio anghrediniaeth Einstein yn
Chwyrn. Dychmyga! Y cyfan oedd ei angen i’w wrthbrofi oedd eirth dŵr.
Ac rydan ni’n gwybod sut y gall dau endid sy’n glymau o arwahanrwydd, sy’n
Bodoli yn rhywle rhwng ffiniau amser a gofod, rywsut brofi
Cyffyrddiad gweithredoedd y llall, a
Chydymdeimlo. Fel yr adeg honno, pan gododd y protestwyr yn Iraq eu ffonau
A dweud wrth y milwyr, “rydan ni’n eich recordio chi.
Byddwch yn ofalus, mae Allah’n gwylio”. Fe deimlais i hynny. Dro arall,
Clywaf chwerthin plant ysgol wrth y goleuadau traffig. Rwy’n
Chwilio’n ofer am y geiriau i’w rhybuddio am yr hyn sydd i ddod.
Am yr oerfel a’r dicter. Y fath oerfel o wylio cegau
Blonegog, soeglyd yn traflyncu tiroedd
Cymru. Am byth, fe fyddan nhw’n lladrata dŵr Cymru tra’n
Chwarae’r ffon ddwybig, yn tynnu’n golygon yn ôl at rengoedd y ffoaduriaid sydd
Ar hyd ein glannau fel ewyn ton Hokusai. Calonnau’n fwy
Brau na chyrff heb siacedi diogelwch yn
Cydio’n dynn wrth atgofion gwlyb-domen. A
Chwyd yr un lleithder drachefn pan
Ânt i wynebu, am y tro cyntaf, gwestiynau ffyrnig y
Banc neu’r Meddyg. Fe brynent eu bara gartref pe
Caent. Pam na allwn ni gynnig ail gartrefi iddyn nhw? Nid rheiny sy’n
Chwalu’r tirweddau lleol ond mannau
Agored i ofalu amdanynt ac, insha Allah, i
Bwyllo, ac anadlu fewn. Pan fydda i’n dweud Syria mae o’n swnio’n debyg i
Cofiwch, weithiau. Alli di deimlo’r llwch siocled ar dy dafod eto? Allwch
Chi? Diolch am roi o’ch amser i ateb y cwestiynau hyn.
Er mwyn mynychu’r digwyddiad a chlywed Hanan Issa yn darllen ei cherdd, a Iestyn Tyne yn darllen ei ddehongliad Cymru, cofrestrwch ar gyfer y digywddiad trwy glicio ar y ddolen hon https://events.zoom.us/ev/AstXlTI35fGhgmulZQelpuRokJoyQyfz04nrJ6artqSvSQcIiz85~AggLXsr32QYFjq8BlYLZ5I06Dg
Caiff cynllun Bardd Cenedlaethol Cymru ei redeg gan Llenyddiaeth Cymru, y cwmni cenedlaethol gyda chyfrifoldeb dros ddatblygu llenyddiaeth.
Mae rhagor o wybodaeth am raglen y digwyddiad ar gael yma.
DIWEDD 20 Medi 2022