Dros y tair blynedd nesaf, bydd gosodwaith ffilm Steve McQueen, Grenfell, yn cael ei ddangos mewn orielau celf cyhoeddus mewn chwe dinas yng Nghymru, Lloegr, yr Alban a Gogledd Iwerddon. Bydd yn agor yn Tramway yn Glasgow yn y gwanwyn, cyn teithio i Chapter yng Nghaerdydd, The MAC ym Melffast, The Box yn Plymouth, Tate Liverpool yn Lerpwl, ac yna MAC yn Birmingham.
Ym mis Rhagfyr 2017, creodd yr artist a’r gwneuthurwr ffilm Steve McQueen (g. 1969, Llundain) waith celf mewn ymateb i’r tân a ddigwyddodd yn gynharach y flwyddyn honno ar 14 Mehefin yn Nhŵr Grenfell. Bu 72 o bobl farw yn y drychineb. Wrth ffilmio’r tŵr cyn iddo gael ei orchuddio, aeth McQueen ati i greu cofnod ohono i sicrhau na fyddai’n cael ei anghofio.
Yn dilyn y tân, lansiwyd Ymchwiliad gan y Llywodraeth a gynhaliwyd mewn dau gam. Mae canfyddiadau cam cyntaf ac ail gam yr Ymchwiliad wedi eu cyflwyno, ond nid yw’r argymhellion wedi’u rhoi ar waith eto, gan olygu y gallai trychineb debyg ddigwydd eto. Mae ymchwiliad troseddol yn mynd rhagddo.
Meddai Steve McQueen “Ro’n i’n gwybod unwaith y byddai’r tŵr yn cael ei orchuddio, y byddai’n dechrau gadael meddyliau pobl. Ro’n i’n benderfynol na fyddai byth yn cael ei anghofio.”
Cyflwynwyd Grenfell yn 2023 am y tro cyntaf yn Serpentine yng Ngerddi Kensington yn Llundain, ar ôl cyfnod o arddangosiadau preifat a oedd yn blaenoriaethu’r teuluoedd oedd yn galaru a’r goroeswyr. Yna gosodwyd y gwaith yng ngofal y Tate ac Amgueddfa Llundain.
Mae’r daith yma’n cael ei chydlynu gan y Tate mewn cydweithrediad â’r lleoliadau partner, ac fe’i gwnaed yn bosib diolch i arian cyhoeddus gan y Loteri Genedlaethol drwy Gyngor Celfyddydau Lloegr a gan Art Fund. Bydd pob arddangosiad am ddim, a bydd rhaglen ymgysylltu gyhoeddus gysylltiedig, a fydd yn cynnwys sgyrsiau, gweithdai a digwyddiadau cymunedol gyda chefnogaeth Sefydliad Grenfell.
___
Gwybodaeth
Tramway, Glasgow, mewn partneriaeth â The Common Guild
8 – 23 Mawrth 2025
Chapter, Caerdydd
10 Mai – 15 Mehefin 2025
The MAC, Belffast
17 Gorffennaf – 21 Medi 2025
The Box, Plymouth
Yn 2026. Dyddiadau i’w cyhoeddi
Tate Liverpool, Lerpwl
Yn 2026-27. Dyddiadau i’w cyhoeddi
MAC, Birmingham
Yn 2027. Dyddiadau i’w cyhoeddi
Mynediad am ddim. Cynghorir ymwelwyr i wirio’r wybodaeth archebu gyda’r lleoliad perthnasol.
___
Nodyn cynnwys
Cynghorir ymwelwyr bod y ffilm yn cynnwys awyrluniau agos o’r tŵr chwe mis ar ôl y tân. Mae hyn yn cynnwys golygfeydd o du mewn i’r adeilad a chontractwyr wrth eu gwaith. Gallai’r delweddau beri gofid i rai. Bydd pob lleoliad yn cynnig cymorth i unrhyw ymwelwyr y mae angen cyfle i oedi a myfyrio arnynt ar ôl gweld y gwaith.