Mae Labordy Arloesi Prydain Di-Garbon, sydd yn y Ganolfan Dechnoleg Amgen, wedi creu grŵp amrywiol i ddatblygu'r strategaeth ar y cyd ag artistiaid, sefydliadau celfyddydol ac arbenigwyr amgylcheddol.
Comisiynodd Cyngor Celfyddydau Cymru y strategaeth mewn partneriaeth â Chyfoeth Naturiol Cymru. Ystyria ffyrdd o ddefnyddio'r celfyddydau i gysylltu pobl â'r argyfwng a beth sydd ei eisiau ar artistiaid a sefydliadau i leihau effaith eu gwaith ar yr amgylchedd.
Dengys y strategaeth ffordd ymlaen i’r celfyddydau gyrraedd targedau amgylcheddol:
- lleihau'r ôl troed carbon
- cadw natur a bioamrywiaeth
- rhai Llywodraeth Cymru
- i’r sector cyhoeddus fynd yn garbon niwtral erbyn 2030
- i Gymru fynd yn sero-net erbyn 2050
Rhwng Tachwedd 2022 a Mawrth 2023 bydd y Labordy yn cynnal cyfres o weithdai ar-lein. Am ragor o wybodaeth a sut i gymryd rhan, cofrestrwch i’n sesiwn rhoi gwybodaeth 4-5pm ddydd Mawrth 11 Hydref 2022 yma: https://events.zoom.us/e/view/7l9Lb5JARUC3BKi4TPcdvg?id=7l9Lb5JARUC3BKi4TPcdvg
Gallwch hefyd lenwi arolwg ar-lein:Strategaeth Cyfiawnder Hinsawdd i’r Sector Celfyddydau yng Nghymru
Bydd yr arolwg yn cau Dydd Mercher, 16 Tachwedd 2022.
"Mae creadigrwydd yn allweddol i ddatrys yr argyfwng natur a’r hinsawdd. Gall y celfyddydau gyfrannu at y frwydr drwy ddychmygu dyfodol cwbl wahanol. Rydym wedi ymrwymo i gefnogi ffyrdd cynaliadwy o weithio. Pleser yw gydweithio â'r Ganolfan i ddatblygu’r strategaeth gyda Chyfoeth Naturiol Cymru a phartneriaid eraill yn y sectorau celfyddydol ac amgylcheddol."
Michael Elliot, Prif Weithredwr Cyngor Celfyddydau Cymru.
"Mae’n wych gael y cyfle i weithio gyda’r Cyngor ar y strategaeth fel rhan o’n partneriaeth Natur Greadigol. Mae'r argyfwng yn rhan anhepgor o’n bywyd beunyddiol erbyn hyn ac mae angen pob cymorth posibl yn yr ymdrech i ailsadio’r cwch. Mae gan y celfyddydau rym i gysylltu pobl â’r byd natur a mynegi eu hofnau a’u gobeithion am y dyfodol. Dengys Cymru ei chyfrifoldeb byd-eang drwy ganolbwyntio ar gyfiawnder cymdeithasol, trechu anghydraddoldeb a chydweithio’n rhyngwladol.”
Clare Pillman, Prif Weithredwr Cyfoeth Naturiol Cymru.
"Dwi wrth fy modd yn gweithio gyda’r Cyngor ar y strategaeth. Mae gan y celfyddydau swyddogaeth bwysig yn y maes. Edrychaf ymlaen yn arw at weithio gydag unigolion, grwpiau a sefydliadau o bob rhan o Gymru i lywio'r strategaeth. Bydd y labordy’n sicrhau clywed pob llais a gweld cyfraniad pawb at y strategaeth a fydd yn hygyrch, effeithiol ac yn addas at y diben."
Dr Anna Bullen, Rheolwr Labordy Arloesi’r Ganolfan.
Mae’r Cyngor yn rhannu Memorandwm o Ddealltwriaeth â Chyfoeth Naturiol Cymru o'r enw Natur Greadigol.