Mae Celfyddydau Anabledd Cymru wrth eu bodd yn cyhoeddi'r artistiaid sydd wedi'u dewis ar gyfer comisiynau Effaith, mewn partneriaeth ag Amgueddfa Cymru a Chorsydd Calon Môn.
Llongyfarchiadau i Kathryn Ashill a Catherine Taylor Parry!
Mae Kathryn Ashill wedi derbyn comisiwn o £10,000 yn gweithio gydag Amgueddfa Cymru a Chelfyddydau Anabledd Cymru. Bydd eu comisiwn yn berfformiad i ffilm, a fydd yn archwilio corff yr anabl a'i berthynas â chyrff dŵr naturiol.
"Fel artist sydd ag angen a chymorth symudedd gweladwy, rwyf yn bwriadu fframio fy nghorff ar draethau ac mewn afonydd fel ffordd o osod y corff anabl yn weledol yn yr amgylchedd."
Mae Catherine Taylor Parry wedi derbyn comisiwn o £2,000 yn gweithio gyda Chorsydd Calon Môn a Chelfyddydau Anabledd Cymru. Bydden nhw'n ymateb i ffrwythlondeb yr amgylchedd, yn enwedig trwy ddefnyddio digonedd o liw a gwead i greu delwedd haenog fertigol, sy'n awgrymu'r newidiadau dros amser yn safle Corsydd yn hanesyddol ynghyd â'r newidiadau naturiol.
"Byddaf yn meddwl am y gors fel cofnod naturiol o amser, gan fod y mawn yn cael ei greu'n araf dros nifer mawr o flynyddoedd ac mae'n dal nid yn unig carbon ond bywyd planhigion, anifeiliaid a hanes Corsydd."
Roedd safon y ceisiadau yn eithriadol o uchel, gan greu penderfyniad anodd i'r detholwyr. Dywedodd Owain Gwilym, Cyfarwyddwr Gweithredol Celfyddydau Anabledd Cymru:
"Mae Celfyddydau Anabledd Cymru yn falch o weithio ochr yn ochr ag Amgueddfa Cymru a Chorsydd Calon Môn i gryfhau cynrychiolaeth anabledd yn y celfyddydau yng Nghymru. Roedd datblygu'r comisiynau yn broses werth chweil ac roedd creadigrwydd a phroffesiynoldeb yr artistiaid anabl a wnaeth gais yn eithriadol."
Dywedodd Alan Whitfield, Swyddog Celfyddydau Gweledol Celfyddydau Anabledd Cymru:
"Mae'n gyfnod cyffrous iawn i weld lefel ac amrywiaeth y gwaith sy'n cael ei chreu gan yr artistiaid. Mae'r broses o weithio gydag Amgueddfa Cymru a Chorsydd Calon Môn wedi bod yn gynhyrchiol iawn, gan allu cefnogi a dysgu oddi wrth ein gilydd."
Bydd y comisiynau yn cael eu dangos fel rhan o Arddangosfa Deithiol Genedlaethol Celfyddydau Anabledd Cymru: Effaith. Bydd y prosiect uchelgeisiol hwn yn arddangos celf weledol bwerus ac arloesol gan artistiaid anabl mewn pum lleoliad celfyddydol blaenllaw ledled Cymru, rhwng mis Chwefror 2026 a mis Mawrth 2027.
Bydd Effaith yn archwilio themâu natur, tirwedd a chyfiawnder hinsawdd o safbwynt anabledd. Mae'r arddangosfa'n cynnig cyfle i gynulleidfaoedd ledled Cymru gael gweld safbwyntiau pobl anabl ar un o faterion mwyaf brys ein hoes. Mwy o wybodaeth yma.